* A Project Gutenberg Canada Ebook *
This ebook is made available at no cost and with very few
restrictions. These restrictions apply only if (1) you make
a change in the ebook (other than alteration for different
display devices), or (2) you are making commercial use of
the ebook. If either of these conditions applies, please
check
gutenberg.ca/links/licence.html before proceeding.
This work is in the Canadian public domain, but may be under
copyright in some countries. If you live outside Canada, check your
country's copyright laws.
If the book is under copyright
in your country, do not download or redistribute this file.
Title: A Lowden Sabbath Morn
Author: Stevenson, Robert Louis (1850-1894)
Illustrator: Boyd, Alexander Stuart (1854-1930)
Date of first publication:
1887 [poem; included in "Underwoods"];
1898 [illustrations in black and white];
1909 [full set of illustrations, including colour frontispiece]
Place and date of edition used as base for this ebook:
London: Chatto & Windus, 1909
Date first posted: 14 April 2011
Date last updated: 14 April 2011
Project Gutenberg Canada ebook #770
This ebook was produced by: David T. Jones, Ross Cooling
& the Online Distributed Proofreading Canada Team
at http://www.pgdpcanada.net
This ebook was produced from images generously made
available by the Internet Archive/New York Public Library
A LOWDEN SABBATH MORN
THE PRAYER p. 16
BY ROBERT LOUIS STEVENSON
ILLUSTRATED BY A. S. BOYD
& PUBLISHED AT LONDON BY
CHATTO & WINDUS MCMIX
First Illustrated Edition published 1898, and a Second Impression in the same year.
New Edition in 1907; and with Coloured Frontispiece in 1909.
Printed by Ballantyne, Hanson & Co.
At the Ballantyne Press, Edinburgh
TO
THE MEMORY OF
ROBERT LOUIS STEVENSON
THIS BOOK IS DEDICATED
BY
THE ILLUSTRATOR
A Lowden Sabbath Morn
I
The clinkum-clank o' Sabbath bells
Noo to the hoastin' rookery swells,
Noo faintin' laigh in shady dells,
Sounds far an' near,
An' through the simmer kintry tells
Its tale o' cheer.
II
An' noo, to that melodious play,
A' deidly awn the quiet sway—
A' ken their solemn holiday,
Bestial an' human,
The singin' lintie on the brae,
The restin' plou'man.
III
He, mair than a' the lave o' men,
His week completit joys to ken;
Half-dressed, he daunders out an' in,
Perplext wi' leisure;
An' his raxt limbs he'll rax again
Wi' painfü' pleesure.
IV
The steerin' mither strang afit
Noo shoos the bairnies but a bit;
Noo cries them ben, their Sinday shüit
To scart upon them,
Or sweeties in their pouch to pit,
Wi' blessin's on them.
V
The lasses, clean frae tap to taes,
Are busked in crunklin' underclaes;
The gartened hose, the weel-filled stays,
The nakit shift,
A' bleached on bonny greens for days
An' white's the drift.
VI
An' noo to face the kirkward mile:
The guidman's hat o' dacent style,
The blackit shoon, we noo maun fyle
As white's the miller:
A waefü' peety tae, to spile
The warth o' siller.
VII
Our Marg'et, aye sae keen to crack,
Douce-stappin' in the stoury track,
Her emeralt goun a' kiltit back
Frae snawy coats,
White-ankled, leads the kirkward pack
Wi' Dauvit Groats.
VIII
A thocht ahint, in runkled breeks,
A' spiled wi' lyin' by for weeks,
The guidman follows closs, an' cleiks
The sonsie missis;
His sarious face at aince bespeaks
The day that this is.
IX
And aye an' while we nearer draw
To whaur the kirkton lies alaw,
Mair neebours, comin' saft an' slaw
Frae here an' there,
The thicker thrang the gate, an' caw
The stour in air.
X
But hark! the bells frae nearer clang;
To rowst the slaw, their sides they bang;
An' see! black coats a'ready thrang
The green kirkyaird;
And at the yett, the chestnuts spang
That brocht the laird.
XI
The solemn elders at the plate
Stand drinkin' deep the pride o' state:
The practised hands as gash an' great
As Lords o' Session;
The later named, a wee thing blate
In their expression.
XII
The prentit stanes that mark the deid,
Wi' lengthened lip, the sarious read;
Syne wag a moraleesin' heid,
An' then an' there
Their hirplin' practice an' their creed
Try hard to square.
XIII
It's here our Merren lang has lain,
A wee bewast the table-stane;
An' yon's the grave o' Sandy Blane;
An' further ower,
The mither's brithers, dacent men!
Lie a' the fower.
XIV
Here the guidman sall bide awee
To dwall amang the deid; to see
Auld faces clear in fancy's e'e;
Belike to hear
Auld voices fa'in saft an' slee
On fancy's ear.
XV
Thus, on the day o' solemn things,
The bell that in the steeple swings
To fauld a scaittered faim'ly rings
Its walcome screed;
An' just a wee thing nearer brings
The quick an' deid.
XVI
But noo the bell is ringin' in;
To tak their places, folk begin;
The minister himsel' will shüne
Be up the gate,
Filled fu' wi' clavers about sin
An' man's estate.
XVII
The tünes are up—French, to be shüre,
The faithfü' French, an' twa-three mair;
The auld prezentor, hoastin' sair,
Wales out the portions,
An' yirks the tüne into the air
Wi' queer contortions.
XVIII
Follows the prayer, the readin' next,
An' than the fisslin' for the text—
The twa-three last to find it, vext
But kind o' proud;
An' than the peppermints are raxed,
An' southernwood.
XIX
For noo's the time whan pows are seen
Nid-noddin' like a mandareen;
When tenty mithers stap a preen
In sleepin' weans;
An' nearly half the parochine
Forget their pains.
XX
There's just a waukrif' twa or three:
Thrawn commentautors sweer to 'gree,
Weans glowrin' at the bumlin' bee
On windie-glasses,
Or lads that tak a keek a-glee
At sonsie lasses.
XXI
Himsel', meanwhile, frae whaur he cocks
An' bobs belaw the soundin'-box,
The treesures of his words unlocks
Wi' prodigality,
An' deals some unco dingin' knocks
To infidality.
XXII
Wi' sappy unction, hoo he burkes
The hopes o' men that trust in works,
Expounds the fau'ts o' ither kirks,
An' shaws the best o' them
No muckle better than mere Turks,
When a's confessed o' them.
XXIII
Bethankit! what a bonny creed!
What mair would ony Christian need?—
The braw words rumm'le ower his heid,
Nor steer the sleeper;
And in their restin' graves, the deid
Sleep aye the deeper.
AUTHOR'S NOTE
It may be guessed by some that I had a certain parish in my eye, and
this makes it proper I should add a word of disclamation. In my time
there have been two ministers in that parish. Of the first I have a
special reason to speak well, even had there been any to think ill. The
second I have often met in private and long (in the due phrase) "sat
under" in his church, and neither here nor there have I heard an unkind
or ugly word upon his lips. The preacher of the text had thus no
original in that particular parish; but when I was a boy he might have
been observed in many others; he was then (like the schoolmaster)
abroad; and by recent advices, it would seem he has not yet entirely
disappeared.
ILLUSTRATOR'S NOTE
I am not certain of the particular parish Stevenson had in his mind when
he wrote this poem, but I am certain that the description is typical of
almost any Scottish rural parish, Lowden (that is, Lothian) or other.
In illustrating the verses it has seemed to me, therefore, unnecessary
to make portraits from any one locality. I fancy the writer looked back
to the period of his boyhood and to the people he knew in more than one
part of his native country, so I have tried to depict that period and
that class of people as I remember them in various counties of his land
and mine.
A. S. B.
The clinkum-clank o' Sabbath bells
Noo to the hoastin' rookery swells,
Noo faintin' laigh in shady dells,
Sounds far an' near,
An' through the simmer kintry tells
Its tale o' cheer.
An' noo, to that melodious play,
A' deidly awn the quiet sway—
A' ken their solemn holiday,
Bestial an' human,
The singin' lintie on the brae,
The restin' plou'man.
He, mair than a' the lave o' men,
His week completit joys to ken;
Half-dressed, he daunders out an' in,
Perplext wi' leisure;
An' his raxt limbs he'll rax again
Wi' painfü' pleesure.
The steerin' mither strang afit
Noo shoos the bairnies but a bit;
Noo cries them ben, their Sinday shüit
To scart upon them,
Or sweeties in their pouch to pit,
Wi' blessin's on them.
The lasses, clean frae tap to taes,
Are busked in crunklin' underclaes;
The gartened hose, the weel-filled stays,
The nakit shift,
A' bleached on bonny greens for days,
An' white's the drift.
An' noo to face the kirkward mile:
The guidman's hat o' dacent style,
The blackit shoon, we noo maun fyle
As white's the miller:
A waefü' peety tae, to spile
The warth o' siller.
Our Marg'et, aye sae keen to crack,
Douce-stappin' in the stoury track,
Her emeralt goun a' kiltit back
Frae snawy coats,
White-ankled, leads the kirkward pack
Wi' Dauvit Groats.
A thocht ahint, in runkled breeks,
A' spiled wi' lyin' by for weeks,
The guidman follows closs, an' cleiks
The sonsie missis;
His sarious face at aince bespeaks
The day that this is.
And aye an' while we nearer draw
To whaur the kirkton lies alaw,
Mair neebours, comin saft an' slaw
Frae here an' there,
The thicker thrang the gate, an' caw
The stour in air.
But hark! the bells frae nearer clang;
To rowst the slaw, their sides they bang;
An' see! black coats a'ready thrang
The green kirkyaird;
And at the yett, the chestnuts spang
That brocht the laird.
The solemn elders at the plate
Stand drinkin' deep the pride o' state:
The practised hands as gash an' great
As Lords o' Session;
The later named, a wee thing blate
In their expression.
The prentit stanes that mark the deid,
Wi' lengthened lip, the sarious read;
Syne wag a moraleesin' heid,
An' then an' there
Their hirplin' practice an' their creed
Try hard to square.
It's here our Merren lang has lain,
A wee bewast the table-stane;
An' yon's the grave o' Sandy Blane;
An' further ower,
The mither's brithers, dacent men!
Lie a' the fower.
Here the guidman sall bide awee
To dwall amang the deid; to see
Auld faces clear in fancy's e'e;
Belike to hear
Auld voices fa'in saft an' slee
On fancy's ear.
Thus, on the day o' solemn things,
The bell that in the steeple swings
To fauld a scaittered faim'ly rings
Its walcome screed;
An' just a wee thing nearer brings
The quick an' deid.
But noo the bell is ringin' in;
To tak their places, folk begin;
The minister himsel' will shüne
Be up the gate,
Filled fu' wi' clavers about sin
An' man's estate.
The tünes are up—French, to be shüre,
The faithfü' French, an' twa-three mair;
The auld prezentor, hoastin' sair,
Wales out the portions,
An' yirks the tüne into the air
Wi' queer contortions.
Follows the prayer, the readin' next,
An' than the fisslin' for the text—
The twa-three last to find it, vext
But kind o' proud;
An' than the peppermints are raxed,
An' southernwood.
For noo's the time whan pows are seen
Nid-noddin' like a mandareen;
When tenty mithers stap a preen
In sleepin' weans;
An' nearly half the parochine
Forget their pains.
There's just a waukrif' twa or three:
Thrawn commentautors sweer to 'gree,
Weans glowrin' at the bumlin' bee
On windie-glasses,
Or lads that tak a keek a-glee
At sonsie lasses.
Himsel', meanwhile, frae whaur he cocks
An' bobs belaw the soundin'-box,
The treesures of his words unlocks
Wi' prodigality,
An' deals some unco dingin' knocks
To infidality.
Wi' sappy unction, hoo he burkes
The hopes o' men that trust in works,
Expounds the fau'ts o' ither kirks,
An' shaws the best o' them
No muckle better than mere Turks,
When a's confessed o' them.
Bethankit! what a bonny creed!
What mair would ony Christian need?—
The braw words rumm'le ower his heid,
Nor steer the sleeper;
And in their restin' graves, the deid
Sleep aye the deeper.
Works by Robert Louis Stevenson
AN INLAND VOYAGE.
EDINBURGH: PICTURESQUE NOTES.
TRAVELS WITH A DONKEY.
VIRGINIBUS PUERISQUE.
FAMILIAR STUDIES OF MEN AND BOOKS.
NEW ARABIAN NIGHTS.
TREASURE ISLAND.
THE SILVERADO SQUATTERS.
A CHILD'S GARDEN OF VERSES.
PRINCE OTTO.
THE STRANGE CASE OF DR. JEKYLL AND MR. HYDE.
KIDNAPPED.
THE MERRY MEN.
UNDERWOODS.
MEMORIES AND PORTRAITS.
THE BLACK ARROW.
THE MASTER OF BALLANTRAE.
FATHER DAMIEN: AN OPEN LETTER.
BALLADS.
ACROSS THE PLAINS.
ISLAND NIGHTS ENTERTAINMENTS.
A FOOTNOTE TO HISTORY.
CATRIONA.
WEIR OF HERMISTON.
VAILIMA LETTERS.
FABLES.
SONGS OF TRAVEL.
ST. IVES.
IN THE SOUTH SEAS.
ESSAYS OF TRAVEL.
TALES AND FANTASIES.
THE ART OF WRITING.
PRAYERS WRITTEN AT VAILIMA.
A CHRISTMAS SERMON.
with Mrs. Stevenson
THE DYNAMITER.
with Lloyd Osbourne
THE WRONG BOX. THE WRECKER. THE EBB-TIDE.
[End of A Lowden Sabbath Morn, by Robert Louis Stevenson,
illustrated by A. S. Boyd]
